No ano 1995, ó abeiro da celebración do V Centenario da creación da Universidade de Santiago de Compostela, tivo lugar, na cidade compostelá, o I Encontro de Centros de Estudios Galegos das Universidades de fóra de Galicia. A política de expansión do estudio da lingua, a literatura e, en xeral, a cultura galegas desenvolvida pola Consellería de Educación e Ordenación Universitaria a través da Dirección Xeral de Política Lingüística da Xunta de Galicia, callou na creación e potenciación de diferentes Centros de Estudios Galegos incorporados a prestixiosas universidades espalladas por todo o mundo. O I Encontro dos responsables destes Centros –Directores e Lectores- en Compostela, supuxo unha primeira e necesaria posta en común de traballos e proxectos que dinamizaran a vida dos Centros, e unha análise da súa situación no contexto dos plans de estudios das respectivas universidades nas que operaban.

          Oito anos parece tempo suficiente para promover, á altura do presente ano 2002 –novo século e novo milenio-, un II Encontro de Centros de Estudios Galegos das Universidades de fóra de Galicia. Os novos tempos, é ben sabido, presentan novos problemas, maiores esixencias e, en consecuencia, solucións axeitadas. A Dirección Xeral de Política Lingüística asume de novo a responsabilidade de reuni-lo persoal que traballa nestes Centros, para avalia- la situación presente, mellorar posibles deficiencias e artellar estratexias que abran novas vías de actuación. 

          O desenvolvemento deste II Encontro de Centros de Estudios Galegos das Universidades de fóra de Galicia terá lugar en Santiago de Compostela os días 20 e 21 de decembro de 2002. 

          O II Encontro constará de dúas partes: unha, aberta para tódolos inscritos, que se celebrará nas mañás dos días 20 e 21, e na que se ofrecerá ó público, en conferencias ou mesas redondas, información do que se está a facer nos Centros; da literatura e prensa galegas publicadas fóra de Galicia ou da actual situación dos estudios de catalán, euskera e galego nas universidades de fóra das súas comunidades autónomas. 

          A segunda parte, de carácter interno, estudiará as publicacións actuais dos Centros e os seus proxectos cara ó futuro, así como a situación dos lectorados nas universidades de fóra de Galicia.